فاكر لما كنا اتنين
قبل ما نبقى واحد؟
كنا حقيقي مختلفين
في حجات بسيطه متشابهين
لكن قلبنا واحد
ايه اللي خلى قربنا
يبقى سبب في بعدنا
ويوم عن يوم بنتباعد؟
كانت بسمكت في شفايفي
وكانت دمعتي في عينك
وان يوم غبت والا بعدت
قلبي وروحي شايفينك
ليه فجأه بقينا مش حاسين
وقلبنا ليه بقى جامد
ياريتنا نرجع تاني اتنين
ويفضل قلبنا واحد
محمد
بنت ناس وعنيها سودا واموره
وحبوبه ودمها ظريف
ومش رفيعه قوي ولا تخينه و كعبوره
ومش بتتعب من هوا التكييف
وبتحب الخروج والفسح وشطوره
انشالله نص نص في شغل البيت والتنضيف
وتبقى طفله وبريئه وتعرف تبقى ام
وتربي العيال وتشيل معايا الهم
ومالهاش الخناق وحرق الدم
وعاقله ولماحه ومخها نضيف
وبين الهم والهم هاحاول اسليها
وعمري ما ازعلها ولا اخليها
تزهق مني والا تشوفني تقول يالطيف
ورقيقه مش نرفوزه ولا زرزوره
وهاخنقها حب وغزل وشعر وتخريف
وتكون بتفهم وبتعرف تقدر
ولما تنام بالليل مش بتشخر
عشان العريس نومه خفيف
محمد
هات ورقه وقلم من الشنطه
هامليك سطرين
اكتب .. حبيبي الغالي شرطه
غيبت عني روحت فين؟؟
مش قلت عمرك مافي يوم هاتبعد؟
طب مش الحر بيوفي لما يوعد؟
والا الكلام ده قلته وخلاص عدى
وكلام الليل مدهون بزبده
وعملت بالمثل بتاع شيل دا من دا؟
عموماً انا مش حزين
انا بس عاوز اقولك كلمتين
حبيبي الغالي نقطتين
وشرطه
حبي ليك كان اكبر غـ لـ طـ ـه
اشطه؟؟
اشطه
محمد
مره كدا من كام يوم
مش فاكر كنت صاحي وسرحان
والا نعسان
والا حتى غطصان في عز النوم
بس لقيتنا فجأه يوم القيامه
وواقفه ناس كتيره يامه
ولقيت الميزان والصراط والحساب
ولقيتني واقف في صف طويييل بالعرض
وفي ايدي الكتاب
وناس عرقها لركبها ولوسطها
وناس عايمه في عرقها عوم
--
وقلت ابص كدا في كتابي
لقيت كتابي مليان ذنوب
سطر ذنب وسطر اتوب
وسطر ذنب وسطر ذنب وسطر ذنب
وسطر اتوب
ولقيتني مره حاسبها صح
والف حاسبها بالمقلوب
معرفشي اذا كان ابليس السبب والا نفسي اللي عليها اللوم
رجعت ابص تاني في كتابي وقلت هاقرا سطر سطر
لقيت ذنوب مالهاش حصر
وكله في الكتاب بالعدد محسوب
مره كريم والف لئيم
وميه اناني وكذا مره مروق الاناني وناسي اصلي وناسي اصوم
مش فاكر كدا من كام يوم
ومش فاكر كمان صحيت من النوم والا فقت من السرحان اللي كنت فيه
بس وقفت وقلت لنفسي اسمعي يابت انتي بقولك ايه؟؟
انا لسه جاي دلوقتي من يوم القيامه
والدنيا هناكـ لا فيها لوم ولا عتاب ولا ملامه
والدنيا زحمه وحر والحساب شغال والمصراط منصوب
قومي بقى يلا نتوب
وكفايه اللي عدى من عمرنا وفاتنا
دا احنا علينا ذنوب بالكوووووم
مش فاكر كدا من كام يوم
محمد
انتي القمر لو القمر في ليله غاب
انتي النجوم والهوى
وانتي السما وانتي السحاب
انتي حياتي ودنيتي – انتي ابتسامتي وفرحتي
مش بس سطر في صفحتي
دا انتي الكتاب
محمد
لهوى النفوس سريرة لاتعلم
عرضا نظرت وخلت اني اسلم
ويادوب قالتي ياحبيبي وحشتني
ولقيت ابوها جاي يسب ويشتم
ياشر خلق الله في الارض يا
ذئبا ً على الحملان يعدو ويهجم
هاقطع رقبتك او لسانك الذي
بلفت بيه عقل البنيه يامجرم
لايسلم الشرف الرفيع من الاذى
حتى يراق على جوانبه الدم
ياعم اهدى بس وصلى ع النبي
طول عمر العقل زينه وخاب الاغشم
دا انا ضيف ياحج عندك مش كدا
ولقد عهدتك ان ضيفك مكرم
وطفقت اجري وهو يجري ورائيا
والمزه تبكي مما جرالي وتلطم
حتى ابتعدنا عنها وصرنا وحدنا
وقفت وقلت ياعم اني اهزم
فتبسم المحروس واقبل ضاحكا
متبخترا نحوي وقورا يتقدم
وناولني (بوكسا) فوق جفني بعزمه
لو ان ابن شداد اخدها هايورم
وقال اذا رايت نيوب الليث
بارزة فلا تظنن ان الليث يتبسم
طبعا مافيش داعي اقول ان البتاعه دي انا اللي كاتبها
:))
حسبت هذا واضحا
شعر عباسي نسبة الى العباسيه وليس الى العباسيين
:))
اعلمه الرمايه كل يوم
فلما استد ساعده رماني
وكم علمته نظم القوافي
وكل ما اقول يقول قول تاني
وتعبت وريقي نشف
والا خر راح ونساني
وبصقت من غيظي عليه حتى
عامت الدنيا وجف لساني
اتفو عليك ياواطي طلعت جزمه
قبيح الخلق بعرور اناني
دا انا ياما سهرت اعلم فيه وافهم
فلما ان قال قافيه هجاني
ساصرف عنهم عقلي وقلبي
لا عاوز اشوفه ولاحتى
عاوزه يراني
وابحث عن بني ادم بيفهم
انسى بيه الاولاني
تخريفي…
لو حد نقلها هاقتله O_o
انا نصاب
لكن عمري ما اكون كذاب
ولا احلف في مره كدب
بالباطل
ومش اهبل ولا مغفل
ولا غافل
ولا في زعلي بتلكك
ولا مايص ولا بصباص وبتسهوك
ولا قاعد اندب حظي ع القهوه
واقول قدري ومكتوبي اكون عاطل
انا راجل.....
لكن نصاب
بعرف اداري جوه في قلبي كل اهاتي وما اقولهاش
وبعرف ارسم على شفايفي وفي عيوني
فرحه لكن ماحسيتهاش
سنين عمري من ايدي بتتسرسب
واحلامي قصاد عيني بتتكركب
سعات راسي وسعات محتار ومتذبذب
ولما افوق وبالي يروق
وترجع تاني احلامي تترتب
انام من تعبي وانساها ولا اشوفهاش
مافيش في الدنيا دي حاجه تستاهل
صحيح يمكن اكون نصاب
ماحبش حد من بره يشوفني مره متاثر
دايما اداري جوايا ودايما هادي وبهزر
لكن في جنوني انا عاقل
ومابخونشي ولااظلمشي
ولا اتحكم ومابقولشي
انا اللي كلامي هنا يمشي
مع اني كلامي حكيم
بدهب وبماس يتاقل
وعمري في يوم ماكنت لئيم
ولا ناقص ولا سافل
انا محمد
سعات محبط سعات فاشل
وسعات ناجح ومتفائل
لكن دايما
انا راجل....
لو حد نقلها هاقطع ايده ^_^
انا كتبتها في سااااعه وتعبتني على ماخلصتها O_o
